Սպանված ոստիկանը երկու երեխաների հայր էր, համակարգում էր 17 տարի

Ազատության պողոտայում ծառայողական պարտականությունները կատարելիս սպանված ոստիկան Տիգրան Առաքելյանը Արարատի մարզի Արգավանդ գյուղից էր, երկու անչափահաս երեխաների հայր։ News.am-ի տեղեկություններով՝ նա ոստիկանության համակարգում էր 2002 թվականից, ուներ ոստիկանության ավագի կոչում։

Հիշեցնենք, որ հոկտեմբերի 16-ին` ժամը 04:20-ին, «Սուրբ Գրիգոր Լուսավորիչ» Բկ են տեղափոխվել 1994 թվականին ծնված Ա. Հակոբյանը և 1981 թվականին ծնված Տիգրան Առաքելյանը։ Վերջինս հիվանդանոցում մահացել է։ Պարզվել է, որ հիվանդանոց տեղափոխված անձինք ՀՀ ոստիկանության ծառայողներ են, ովքեր նույն օրը՝ ժամը 03:40-ի սահմաններում, իրենց ծառայությունը կատարելու ընթացքում, «Հաղթանակ» զբոսայգու մուտքի մոտ նկատել են երկու անձի։ Վերջիններս, տեսնելով պարեկային մեքենան, դիմել են փախուստի։ Ոստիկանության ծառայողները հետապնդել են նրանց և Ազատության պողոտայում բռնել։ Բռնված անձինք փորձել են դիմել փախուստի, որի ժամանակ նրանցից մեկը հափշտակել է ոստիկաններից մեկին ամրակցված զենքը, հարվածել Ա.Հակոբյանի գլխին և կրակել Տ.Առաքելյանի ձախ բազկին, ով ստացած մարմնական վնասվածքներից մահացել է:

Դեպքի առթիվ հարուցվել է քրեական գործ՝ ՀՀ քրեական օրենսգրքի 238-րդ հոդվածի 1-ին մասով, 316-րդ հոդվածի 2-րդ մասով և 104-րդ հոդվածի 1-ին մասով։  Ոստիկանության ծառայողների նկատմամբ հարձակում կատարելու կասկածանքով երկու եղբայրների են բերման ենթարկել։