Լևոն Երանոսյանի գործով նիստը կրկին հետաձգվեց
Երևանի ընդհանուր իրավասության դատարանում Հարություն Մանուկյանի նախագահությամբ այսօր վերսկսվել է նախկին փոխոստիկանապետ Լևոն Երանոսյանի գործի քննությունը։
Հիշեցնենք՝ մոտ 3 ամիս նիստերը չեն կայացել: Դատավորը տեղեկացրեց, որ նիստին չի ներկայացել պաշտպան Տիգրան Սաֆարյանը, և այդ պայմաններում անհնար է գործի քննությունը շարունակել: Նիստը մի քանի րոպե տևեց։
Ըստ մեղադրանքի՝ Լևոն Երանոսյանը 2018 թվականի ապրիլի 16-ի և ապրիլի 22-ի բողոքի զանգվածային ակցիաների ժամանակ կիրառել է «Զարյա» տեսակի ութ լուսաձայնային նռնակ:
Նախկին փոխոստիկնաապետի գործողությունների հետևանքով տուժել են երկու տասնյակից ավելի ցուցարարներ: Երանոսյանի նկատմամբ որպես խափանման միջոց ընտրվել է ստորագրություն չհեռանալու մասին: Տուժողների թվում է նաև Ազգային ժողովի փոխնախագահ Ալեն Սիմոնյանը:
Նա չի ընդունում առաջադրված մեղադրանքը և հայտարարում է, որ ոստիկանության գործողությունների արդյունքում հնարավոր է եղել ապահովել իշխանության անցնցում փոխանցումը։
