Սա ճիշտ մոտեցում չի․ վարչապետը՝ Դավիթ Անանայանին

Կառավարությունն այսօրվա նիստում ընդունեց «Հայաստանի Հանրապետության հակակոռուպցիոն ռազմավարությունը եւ դրա իրականացման 2019-2022 թվականների միջոցառումների ծրագիրը հաստատելու մասին» կառավարության որոշման նախագիծը:

Ռազմավարությամբ հատուկ անդրադարձ է կատարվում հակակոռուպցիոն կրթությանը եւ իրազեկման միջոցով կոռուպցիայի նկատմամբ ժխտողական վերաբերմունքի սերմանմանը:

Պետեկամուտների նախագահ Դավիթ Անանյանը նշեց, որ նախագծի կետերից մեկի վերաբերյալ ՊԵԿ-ը հնարավորություն չի ունեցել ավելի համապարփակ տեսակետ ներկայացնելու, վարչապետը արձագանքեց. «Ինձ զարմացնում է, երբ որ հարցը գալիս, հասնում է նիստ ու ասվում է՝ չի քննարկվել մեզ հետ: Առնվազն, իմ մասնակցությամբ 3 քննարկում է եղել: Սա ճիշտ մոտեցում չի: Այս տրամաբանությամբ մենք տեղում կդոփենք, սա քաղաքական հարց է, քաղաքական որոշումը կայացված է»,- ասաց Փաշինյանը եւ հավելեց, որ չպետք է մեկ քայլ առաջ անեն, բայց երկու քայլ հետ գնան:

Արձագանքելով քննադատություններին, թե այս նախագծով թուլացնում են Ազգային անվտանգության ծառայությունը, Ոստիկանությունը, Փաշինյանը նշեց, որ ճիշտ հակառակն է՝ ուժեղացնելու են. «Մենք հասկացանք, որ մեծ ալերգիաներ է առաջացնում վեթինգ բառը, որոշեցինք բովանդակությունը մնա, վերնագիրը ուրիշ լինի: Մենք ասում ենք, որ պաշտոնատար անձի բարեվարքությունը ստուգելու գործուն մեխանիզմներ պետք է լինեն եւ մենք դրանք քայլ առ քայլ ստեղծում ենք»:

Վարչապետը նշեց, որ քննարկումների արդյունքում եզրակացության են եկել, որ այս նախագծով միանշանակ ԱԱԾ-ն դառնալու է շատ ավելի ուժեղ կառույց, լուրջ,խորքային, բովանդակային գործառույթներով. «Ազգային անվտանգությունը պետք է լինի ժողովրդի անվտանգության ողնաշարը», եզրափակեց վարչապետը։