Ռոստովում ՀՀ հյուպատոսությունը հերքել է հայ տղայի հանդեպ բժիշկների կողմից բռնության լուրը
Դոնի Ռոստովում Հայաստանի գլխավոր հյուպատոսությունն անդրադարձել է Դոնի Ռոստովում աշխատանքի ժամանակ էլեկտրական ցնցում ստանալու հետևանքով վերակենդանացման բաժանմունքում հայտնված Ռոման Բաբայանի նկատմամբ բժիշկների վատ վերաբերմունքի վերաբերյալ սոցիալական ցանցերում և լրատվամիջոցներում հայտնված տեղեկատվությանը:
Հյուպատոսությունից հայտնում են, որ տարածված տեղեկություններն իրականությանը չեն համապատասխանում:
Դոնի Ռոստովում ՀՀ գլխավոր հյուպատոսության ներկայացուցիչները երկու անգամ այցելել են վերակենդանացման բաժանմունքում գտնվող Ռոմանին: Ռոմանի հետ զրույցում նա անձամբ հերքել է տեղեկությունները բժիշկների կողմից իրեն ծեծելու և վատ վերաբերմունքի մասին, ինչպես նաև ասել, որ ինքն Ուզբեկստանի Հանրապետության քաղաքացի է:
Հիվանդանոցի այրվածքների բաժանմունքի վարիչ Հարություն Դոմբաևը հայտնել է, որ տուժածի վիճակը ծանր է, և տղամարդուն կվիրահատեն՝ կատարելով մաշկի փոխպատվաստում:
