Էջմիածնում առաջին անգամ կանցկացվի Քուֆթայի փառատոն
Հոկտեմբերի 8-ին Էջմիածինը նշում է հիմնադրման 2704-ամյակը: Այդ օրը քաղաք այցելելու կարևորագույն պատճառներից մեկն էլ Քուֆթայի (կոլոլակ) փառատոնն է:
Առաջին անգամ անցկացվող Քուֆթայի (կոլոլակ) փառատոնը շատ լավ հնարավորություն է ծանոթանալու հայկական ավանդական ուտեստներից մեկի՝ քուֆթայի և հատկապես Էջմիածնի քուֆթայի համին և պատրաստման գաղտնիքներին:
Էջմիածնի խոհանոցում թե´ բույրով, թե´ համով առանձնանում է քուֆթան/կոլոլակը. այս մասին խոսում են բոլորը: Այստեղ քուֆթա/կոլոլակ պատրաստում են անհիշելի ժամանակներից: Քաղաքում անգամ հայտնի է «քուֆթաչիների»՝ քուֆթա պատրաստողների փողոցը, որտեղից կարող ես գնել լավագույն քուֆթան։
Բոլոր նրանց, ում հետաքրքրում է ուտեստը, դրա պատրաստման տարբեր եղանակները, հոկտեմբերի 8-ին սիրով հրավիրում ենք Էջմիածին:
Փառատոնը սկսվելու է ժամը 14:30-ին՝ Էջմիածնի համայնքապետարանի հարակից տարածքում: Փառատոնի ընթացքում նախատեսվում է ուտեստների համտես եւ ցուցահանդես-վաճառք: Խոստանում ենք նաեւ համեղ գինի: Փառատոնը ուղեկցվելու է հայկական ազգային պարով և երգ-երաժշտությամբ:
Նախաձեռնության հեղինակներն են Էջմիածնի համայնքապետարանը և «Հայ խոհարարական ավանդույթների զարգացման եւ պահպանման» հասարակական կազմակերպությունը:
