Ֆրանսիայում մի քանի դեղեր մարդկանց մահվան են հասցնում. մեղադրանք է առաջադրվել

Ֆրանսիայում աղմկահարույց դատավարություն է սկսվել դեղագործական հսկա Servier ընկերության նկատմամբ:

 Այն մեղադրվում է Mediator դեղորայքով դիաբետով հիվանդների ոչ դիտավորյալ սպանության մեջ: 

Դատավարությունը պետք է պարզի՝ արդյոք դեղագործական ընկերությունը պատասխանատվությո՞ւն է կրելու Mediator դեղն օգտագործած առնվազն 500 մարդու մահվան համար, գրում է BBC-ի ռուսական ծառայությունը: Անկախ հետազոտության անդամները պնդում են, որ դեղահաբից մահացածների թիվը կարող է հասնել մինչև 2 հազարի:

Մեղադրյալի աթոռներին են հայտնվել նաև Ֆրանսիայի դեղամիջոցների անվտանգության գործակալության (ANSM) մի քանի անդամներ, ովքեր մեղադրվում են բազմաթիվ ահազանգերից հետո դեղամիջոցի արտադրությունը շարունակելու մեջ: Մեղադրող կողմը պնդում է, որ Servier-ն իր հիվանդներին չի նախազգուշացրել դեղի օգտագործման բարդությունների մասին:

20-րդ դարի 70-ականներին մշակված Mediator դեղը նախատեսված է եղել դիաբետ ունեցող գեր հիվանդների համար: Ավելի ուշ այն սկսեցին նշանակել բոլորի նիհարել ցանկացողներին՝ ախորժակը ճնշելու համար: 2009 թվականից դեղի վաճառքն արգելվեց Ֆրանսիայում, ապա նաև ԱՄՆ-ում, Իսպանիայում և Իտալիայում:

Դատավարությունը կշարունակվի մինչև 2020 թվականի ապրիլը: Հայցվորների փաստաբանները Servier-ին մեղադրում են մահաբեր դեղամիջոցի վաճառքից առնվազն մեկ միլիարդ եվրո վաստակելու մեջ: