Խոշոր հրդեհ Հայթաղ գյուղում. երիտասարդները պայքարել են մի քանի տների տանիքներում առաջացած կրակի դեմ
Այսօր՝ սեպտեմբերի 18-ին, խոշոր հրդեհ է տեղի ունեցել Արմավիրի մարզում։ Ժամը 16։50-ի սահմաններում արտակարգ իրավիճակների նախարարության փրկարար ծառայության 9-11 օպերատիվ կառավարման կենտրոն ահազանգ է ստացվել, որ Հայթաղ գյուղի Մենուա փողոցում տան տանիքներ են այրվում։ Ինչպես դեպքի վայրից հայտնում է ֆոտոլրագրող Գագիկ Շամշյանը, մինչ կժամանեին ԱԻՆ ՓԾ Վաղարշապատի, հետո արդեն՝ Արմավիրի և Երևանի հրշեջ-փրկարարական ջոկատներից, գյուղացիները, հիմնականում, ավագ սերնդի տղամարդիկ ու երիտասարդ տղաները, վտանգելով իրենց կյանքը, պայքարել են կրակի տարածման դեմ։ Ժամանած հրշեջներն արդեն քաղաքացիների օգնությամբ շարունակել են նախ պայքարել կրակի տարածման դեմ, որից հետո մարել են մի քանի տներում առաջացած կրակը։
Գ. Շամշյանի տեղեկություններով՝ տուժածներն են նշված փողոցի թիվ 29. 31 և 33 տների սեփականատերեր Եղիշե Խաչատրյանը, Պատվական Սիրեկանյանը և Մարատ Ղամբարյանը։ Ամբողջությամբ այրվել է թիվ 29 և 31 տների տանիքները, մասամբ էլ՝ թիվ 33 տան տանիքը։
