Այսօր Ամուլսարի պահպանության հարցով շահագրգռված քաղաքացիների և ոստիկանության միջև Ազգային ժողովի դիմաց քաշքշուկ է տեղի ունեցել: Ոստիկանությունը պատ է կազմել ու հավաքված ժողովրդին թույլ չի տալիս մուտք գործել Ազգային ժողովի այգու տարածք:

Քաղաքացիները հայտարարել էին, որ գալիս են ԱԺ այգի՝ հանրային քննարկում անցկացնելու: Սակայն մուտք չունենալով այգու տարածք՝ հավաքված քաղաքացիները վանկարկում են՝ այգին բացեք:

Ոստիկանությունը այգու մուտքը փակելը հիմնավորում է անվտանգության կանոնների պահպանմամբ:

Այս կապակցությամբ քիչ առաջ ԱԺ հայտարարություն է տարածել, ըստ որի ԱԺ տարածքում կազմակերպվող յուրաքանչյուր միջոցառում՝ օրենսդրությամբ նախատեսված հավաք, բողոքի ակցիա, ֆիլմերի և տեսահոլովակների նկարահանում, համերգ և այլն, կարող է իրականացվել միայն Ազգային ժողովի նախագահի գիտությամբ՝ Ազգային ժողովի աշխատակազմի ղեկավար-գլխավոր քարտուղարի թույլտվությամբ և պահպանության ծառայության պետի համաձայնությամբ: