ԱԽ քարտուղարն անդրադարձել է BBC-ի հրապարակմանը․ սա սպառնալիք չէ՞ անվտանգության տեսանկյունից

Անվտանգության տեսանկյունից, բնականաբար, լավ կլիներ, որ այդ փաստաթղթերը չհայտնվեին այդ լրատվամիջոցի մոտ, բայց եթե արդեն հայտնվել են, դա պատասխանատու մարմինների գործն է. այս մասին կառավարության նիստից հետո լրագրողների հետ զրույցում ասաց Անվտանգության խորհրդի քարտուղար Արմեն Գրիգորյանը՝ անդրադառնալով երեկ BBC-ի ռուսական ծառայության կողմից «Մարտի մեկի» գործի հետ կապված հրապարակմանը:

Հարցին՝ սա սպառնալիք չէ՞ անվտանգության տեսանկյունից, Գրիգորյանը պատասխանեց. «Աշխարհի ոչ մի երկրում լուծված չէ այդ հարցը, և գաղտնիության հարցի հետ առնչվում են բոլորը. «Վիկիլիքս»-ը վառ օրինակ է դրան, որ աշխարհի ամենահզոր երկրներից մեկի՝ Ամերիկայի ամբողջ գաղտնի փաստաթղթերը հայտնվել են լրատվամիջոցներում: Մենք ապահովագրված չենք դրանից,  բայց աշխատում ենք, որպեսզի մինիմումի հասցնենք այդ վտանգը»:

Հարցին էլ, որ նա փաստորեն չի բացառում, որ Հայաստանի անվտանգության հետ կապված փաստաթղթեր կարող են հայտնվել նույնիսկ թշնամական երկրներում, անվտանգության  խորհրդի քարտուղարն արձագանքեց՝ իրենք ամեն ինչ անում են, որ որևիցե արտահոսք չլինի և դրա համար կան մեխանիզմներ, կա գաղտնիության մասին օրենք:

Ճշտող հարցին՝ երաշխավորո՞ւմ է, որ այդ փաստաթղթերը BBC-ի ձեռքում չեն հայտնվել պաշտոնատար անձի կամ իշխանության ներկայացուցիչների աջակցությամբ, Գրիգորյանը հայտարարեց. «Դրա համար պատասխանատու մարմինը պետք է հետաքննություն անցկացնի և հասկանա, թե ինչ պատճառով են այդ թղթերը հայտնվել տվյալ լրատվամիջոցի ձեռքում, այս պահին վաղ է դրա մասին խոսել»:

Իսկ թե ինչպես պետք է հետաքննություն տեղի ունենա, արդյո՞ք ՀՔԾ-ում պետք է տեղի ունենա հետաքննություն, Արմեն Գրիգորյանը կրկին հայտարարեց, որ հետաքննող մարմինները կպարզեն, կհասկանան, թե ինչ եղանակով են հայտնվել այդ փաստաթղթերը BBC-ի ձեռքում:

Հարցին էլ՝ որպես անվտանգության խորհրդի քարտուղար, իրեն չի՞ մտահոգում այս հարցը, Գրիգորյանը պատասխանեց. «Բնականաբար, ոչ միայն ես, այլ անվտանգության համար ցանկացած պատասխանատու էլ մտահոգվում է: Մեզ համար շատ կարևոր է, որ գաղտնի ինֆորմացիայի արտահոսք չլինի, որովհետև գաղտնիություն նաև նշանակում է անվտանգություն և ապահովություն»:

Իսկ թե որտեղ է թերացում տեսնում, ասաց, որ պետք է հետաքննել և հասկանալ: