Ավինյանը կհանդիպի Ալավերդու պղնձաձուլական գործարանի աշխատակիցների հետ

ՀՀ փոխվարչապետ Տիգրան Ավինյանը հուլիսի 8-ին կհանդիպի Ալավերդու պղնձաձուլական գործարանի աշխատակիցների հետ։ Այս մասին այսօր՝ հուլիսի 2-ին, NEWS.am-ին հայտնեց գործարանի նախկին աշխատակից Արմեն Կիրակոսյանը։ Նա ասաց, որ իրենք երեկ հանդիպել են Լոռու մարզպետ Անդրեյ Ղուկասյանի հետ։ Մարզպետն իրենց հայտնել է այն մասին, որ կգա փոխվարչապետը, եւ կլինի աշխատողների հետ քննարկում. «Ենթադրում ենք, որ կլինի որեւէ պարզաբանում, եւ հստակ լուծումներ կառաջարկեն մեզ»։

NEWS.am-ը փորձեզ զրուցել նաեւ Ալավերդու պղնձաձուլական գործարանը շահագործող «Էյ-Սի-Փի» ՓԲ ընկերության տնօրեն Լուսինե Մեջլումյանի հետ, սակայն աշխատակիցը հայտնեց, որ տնօրենը շուտով հանդես է գալու հայտարարությամբ։

Նշենք, որ Ալավերդու պղնձաձուլական գործարանի աշխատակիցները  երեկ վաղ առավոտից փակել էին Երեւան-Թբիլիսի երկաթգիծը եւ գործարանի ելքերն ու մուտքերը։ Գործարանի 200 աշխատակիցների ազատել են աշխատանքից, նրանք էլ պահանջում էին կառավարության անդամների հետ հանդիպում, որ կամ երկարաձգեն պայմանագրերը կամ այլընտրանք առաջարկեն իրենց։