ԱԺ «Իմ քայլը» խմբակցության անդամ Արփինե Դավոյանը Հաշվեքննիչ պալատի նախագահ Լևոն Յոլյանին դիմեց թաղման նպաստների վիճակագրությանը վերաբերող հարցերով: Նա մեջբերեց՝ առկա են մեկ անձի կողմից թաղման նպաստ ստանալու բազմաթիվ դեպքեր՝ 86 մլն դրամ ընդհանուր արժողությամբ, 60 անձ ստացել է 448 թաղման նպաստ, ընդ որում՝ 4 անձ ստացել է 267 թաղման նպաստ՝ 53.4 մլն դրամ ընդհանուր գումարով, 1 անձ՝ 169 թաղման նպաստ, 3 անձ՝ համապատասխանաբար 45, 35 և 18 թաղման նպաստ:

«Ես ուզում եմ հասկանալ՝ սրանք Հաշվեքննիչ պալատի կողմից զուտ արձանագրվե՞լ են և թողնվե՞լ, թե՞ պետք է տիրապետենք նաև տեղեկությունների՝ ովքեր են այդ անձինք: Կարևոր է իմանալ՝ պատասխանատվության ենթարկվե՞լ են, ենթարկման փուլո՞ւմ են, կամ՝ արձանագրեցինք, անցանք առա՞ջ, թե՞ ձեռնարկվեցին գործողություններ»,- հարց ուղղեց նա:

Յոլյանը կրկին հիշեցրեց, որ Հաշվեքննիչ պալատի լիազորությունները սահմանափակ են, նշեց՝ խորհրդարանն ունի նաև վերահսկողական ֆունկցիաներ, և կարող են դիմել սոցապ նախարարություն, ստանալ այդ տեղեկությունները:

«Իրենց համար այդ ինֆորմացիան շատ հասանելի է՝ բանկի՞միջոցով են արել, թե՞ «Հայփոստ»-ի: 1 անձը 33,4 մլն դրամի շրջանակում է գումար ստացել, ծավալը մեծ է, կարող եք դիմել սոցապ, ստանալ պատասխան»,- ասաց Յոլյանը: