ՏԵՍԱՆՅՈՒԹ. Շարունակվում է Քոչարյանի և մյուսների գործով բողոքների քննությունը

Վերաքննիչ քրեական դատարանում, դատավոր Արմեն Դանիելյանի նախագահությամբ ընթանում է ՀՀ երկրորդ նախագահ Ռոբերտ Քոչարյանի և մյուսների գործի քննությունը։ Ռոբերտ Քոչարյանը այսօրվա դատական նիստին դարձյալ չի ներկայացել։ Նրա պաշտպան Հայկ Ալումյանը տեղեկացրեց, որ երկրորդ նախագահին իրազեկել է դատական նիստի մասին և նա իր դիրքորոշումը չի փոխել, այսինքն նպատակահարմար չի գտնում մասնակցել դատական նիստին, գրում է News.am-ը։ 

Այսօրվա նիստում դատախազության և տուժող կողմի բողոքների վերաբերյալ իրենց առարկությունները կներկայացնեն պաշտպանները։

Գլխավոր դատախազությունը և տուժող կողմը բողոքարկել են մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20֊ի՝ քրեական գործի վարույթը կասեցնելու և Սահմանադրական դատարան դիմելու որոշումը: Դատախազները պահանջում են փոխել Ռոբերտ Քոչարյանի նկատմամաբ ընտրված անձնական երաշխավորությունը և նրան կալանավորել, իսկ գործի վարույթը կասեցնելու դատարանի որոշումը բեկանել և կայացնել նոր դատական ակտ։