Քոչարյանի 26-ամյա որդու հաշվին 18 մլն դոլար էր փոխանցվել. Գլխավոր դատախազ

Գլխավոր դատախազ Արթուր Դավթյանն այսօր Վերաքննիչ քրեական դատարանում Ռոբերտ Քոչարյանի և մյուսների գործով դատական նիստի ընթացքում, անդրադառնալով Քոչարյանին կաշառքի դրվագով ներկայացված մեղադրանքին, հայտարարեց, որ այն ժամանակ Քոչարյանի 26-ամյա որդու հաշվին 18 մլն դոլար է փոխանցվել:

Քոչարյանի որդին՝ Լևոն Քոչարյանը դատական նիստից հետո լրագրողների հարցին ի պատասխան ասաց, որ խոսքը իր եղբոր մասին է, քանի որ 2007 թվականին նա է եղել 27 տարեկան:

“Ոչ թե գումար է փոխանցվել, այլ հաշվի շարժի մասին էր խոսքը: Ես շնորհակալ եմ պարոն Գլխավոր դատախազին, որ փաստորեն փարատեց այդ միլիարդավոր դոլարների մասին կարծիքները և խոսում է դրանից շատ ցածր գումարի մասին: Նա դա ասաց կաշառքի դրվագի հետ կապված: Ասաց՝ այ այս տարիներին իր մոտ շարժ է եղել: Ասում են՝ այս կինը՝ Սիլվա Համբարձումյանը նման բան հայտարարեց, այստեղ էլ այսքան գումար կա: Բայց ոչ մի կերպ դրանց կապը չկա, ոչ էլ նման ցուցմունք կա»,- ասաց Լևոն Քոչարյանը: