Մենք դեմ ենք 10 մլն դրամ տուգանքին. արձագանք «Գազպրոմ Արմենիայից»
Դեմ ենք Հանրային ծառայությունները կարգավորող հանձնաժողովի կողմից «Գազպրոմ Արմենիային» 10 մլն դրամով տուգանելուն և իրավաչափ չենք համարում այդ տուգանքը: Այս մասին այսօր լրագրողների հետ զրույցում ասաց «Գազպրոմ Արմենիա» ընկերության գլխավոր տնօրենի տեղակալ Աշոտ Հակոբյանը:
«Այս բոլոր գործառույթների ընթացքում Գազպրոմ Արմենիայի կողմից բացառապես բաժանորդների շահերից բխող գործողություններ են կատարվե»-նշեց նա:
Հիշեցնենք` Հայաստանի Հանրապետության հանրային ծառայությունները կարգավորող հանձնաժողովի 2019 թվականի տարեկան աշխատանքային ծրագրով սույն թվականի փետրվարի 28-ից մարտի 6-ն ընկած ժամանակահատվածում «Գազպրոմ Արմենիա» ՓԲԸ-ում իրականացվել է մոնիթորինգ՝ ընկերության կողմից ներկայացված նոր միացման գործընթացի վերաբերյալ տեղեկատվության հավաստիության ստացման նպատակով: Իրականացված մոնիթորինգի արդյունքում պարզվել է, որ որոշ դեպքերում չեն պահպանվել Հանձնաժողովի որոշմամբ հաստատված բնական գազի մատակարարման և օգտագործման կանոնների կետերի, ինչպես նաև հանձնաժողովի որոշմամբ հաստատված ընկերության բնական գազի բաշխման լիցենզիայի պայմանների պահանջները: ՀԾԿՀ-ն որոշում է կայացրել ընկերությանը տուգանել` 10 000 000 դրամ գումարի չափով։
