Հարձակման է ենթարկվել. վստահ է, որ Քոչարյանն ու ՀՅԴ-ն կապ ունեն

Այսօր հարձակման է ենթարկվել ՀԱԿ անդամ Վարդան Հարությունյանը, որը լուրջ կասկածներ ունի, որ ծեծի կազմակերպիչները Ռոբերտ Քոչարյանի եւ ՀՅԴ-ի հետ առնչվող անձինք են: Հարությունյանը ֆեյսբուքյան իր էջում լուսանկար է հրապարակել, որտեղ երեւում են իր դեմ կիրառված բռնության հետքերը: «Աշխատանքի վայրում էի, դուրս եկա, հետնադռնի մոտ մի քանի քայլ գնացի եւ առանց բառ խոսելու՝ մի քանի հոգով հարձակվեցին վրաս: Սրանից մի քանի օր առաջ էլ էր նույն դեպքը տեղի ունեցել մեր շենքի մոտ՝ հարձակվել էին ինձ վրա, դիմել էի ոստիկանություն եւ մինչեւ հիմա ոչ մի արձագանք չկա».- Հայկական Ժամանակի-ի հետ զրույցում պատմել է Վարդան Հարությունյանը: Լրատվականի հարցին, թե ինչի՞ց է եզրակացրել, որ միջադեպը կապ ունի ՀՅԴ-ի հետ, Հարությունյանը պատասխանել է . «Դա միայն իրենց գործելաոճն է: Ես միշտ հրապարակային քննադատել եմ նրանց ու նաեւ Ռոբերտ Քոչարյանին: Քոչարյանին ազատ արձակելու օրն էլ Ազատության հրապարակում մասնակցել եմ նրան ազատ արձակելու դեմ իրականացված հանրահավաքին»: