Սարդարապատի հուշահամալիրում այսօր նշվում է Հանրապետության օրը: Սարդարապատի հուշահամալիրում են ՀՀ վարչապետ Նիկոլ Փաշինյանը, ինչպես նաև Հայաստանի հոգևոր և ռազմաքաղաքական ղեկավարությունը: Փաշինյանը շնորհավորել է տոնի կապակցությամբ, նշել, որ այդ սխրանքով են ոգեշնչվում նաև այսօրվա հպարտ քաղաքացիները: «Կանգնած ենք սուրբ հողի վրա, որովհետև նաև այստեղ է հեղվել այն սուրբ արյունը, որով ապրելու և լինելու իրավունք է տրվել մեզ: Այստեղ հեղված սուրբ արյունն է ապացուցել, որ հայ ժողովուրդը կենսունակ, ապրելու ժողովուրդ է և պատմությանը վերջ դնելու ցանկացած փորձ դատապարտված է ձախողման: Գալիս ենք ասելու, որ գիտակցում ենք մեր պատմական պատասխանատվությունն այս ճակատամարտերի հաղթողների առաջ, ասում ենք, որ իզուր չի հեղվել արյունը, նրանց սխրանքին նոր բովանդակություն են հաղորդում այստեղ քայլող սերունդները: Հանգչե՛ք խաղաղությամբ Սարդարապատի, Բաշ Ապարանի ու Ղարաքիլիսայի սուրբ նահատակներ, Առաջին հանրապետության կառավարության անդամներ: Չորս վարչապետնե՛ր, հանգչե՛ք խաղաղությամբ, հերոսամարտը կերտած հրամանատարությո՛ւն,ձեր սխրանքը, գործը տեր ունի այսօր: Վազգենից մինչև Մելքոնյան, ձեր սխրանքներով են ոգեշնչվել նաև Ապրիլյան հերոսամարտի հերոսները… Հայոց բանակի այն շարքայիններն ու սպաներն ամեն օր անխոնջ կրում են հայրենիքի անվտանգության ծանր, բայց հպարտանալու պատասխանատվությունը»,-ասել է վարչապետը: