Ես իմ ամուսնուն շատ եմ սիրում. Աննա Հակոբյան
Վարչապետի տիկին Աննա Հակոբյանն այսօր ասուլիսում անդրադարձել է ամուսնու հետ արտերկիր կատարվող այցերին: Լրագրողի հարցին, թե ինչու է այսքան շատ շրջագայում ամուսնու հետ և առանց նրա, Հակոբյանն ասել է՝ ես իմ ամուսնուն շատ եմ սիրում:
«Չգիտեմ` ինչի՞ նախորդները չէին ուղեկցում իրենց ամուսիններին, իրենք էլ ունեին այդ հնարավորությունը, կարող էին նստել ինքաթիռ ու գնալ, կողքին լինել: Ես ի՞նչ իմանամ` ինչի՞ չէին գնում: Ես իմ ամուսնուն շատ եմ սիրում»,- ասել է Աննա Հակոբյանը:
Մյուս կողմից, ըստ նրա, իր շրջագայությունները շատ են ստացվում, քանի որ որոշակի գործունեություն է իրականացնում: Ասում է՝ հենց այնպես որևէ տեղ չի պատրաստվում գնալ, ընտանիքի ժամանակն ու պետական ռեսուրսն էլ անիմաստ չի վատնի:
«Որ էդքան դրա տակ փորձում են փնտրել փողերի վատնում… ԱՄՆ-ի օրինակը բերեմ՝ 10 մլն դրամ ենք ծախսել այցի վրա, Հայաստան ենք բերել 755 մլն դրամ: Ես չեմ կարող ուղղակի որևէ տեղ գնալ: Ես դրա ժամանակը չունեմ, ես ունեմ մեծ ընտանիք, ունեմ ամուսին, ում կողքին պիտի լինեմ Հայաստանում: Ունեմ փոքրիկ երեխա, որին ամեն անգամ թողնել, որևէ տեղ գնալը մեծ սթրես է թե՛ ինձ համար, թե՛ իր: Առաջին հերթին իմ համար ու իմ ընատնիքի համար, եթե իմ գնացած տեղը չունենա որևէ օգուտ Հայաստանի համար, ես երբևէ դա ինձ թույլ չեմ տա, ես իմ ընտանիքի ժամանակից չեմ ծախսի, ուր մնաց թե պետական ռեսուրս ծախսեմ», – պարզաբանում է վարչապետի կինը:
