Քրեական գործեր Կարբիի համայնքապետի դեմ. բնակիչները ահազանգում են`շարունակում է պաշտոնավարել
Արագածոտնի մարզի Կարբի համայնքի համայնքապետ Կարո Բաղդասարյանը շարունակում է մնալ աղմկահարույց պատմությունների կիզակետում։
Բնակիչները ArmDay .am-ի հետ զրույցում նշել են, որ գյուղում ցանկացած հարց համայնքապետը ոնց ցանկանա, այդպես էլ կլուծի:
«Դպրոցն իրենց ձեռքում է, մանկապարտեզն ու գյուղապետարանը էլի իրենցն է։ Գյուղին պատկանող հողատարածքները վաճառվում են օտարազգիներին, դեպքեր են եղել, որ հողամասի տերը միայն դրա վաճառքից հետո է իմացել, որ իր հողը վաճառված է»,- լրատվականի հետ զրույցում ասել է բնակիչներից մեկը, ում խնդրանքով անունը չենք հրապարակում:
Բնակիչների խոսքով՝ համայնքապետի անվան շուրջ բազմաթիվ բողոքներ կան, անգամ՝ Քննչական կոմիտում հարուցված գործեր կան, գյուղացիներից հող է խլել, խոշոր չափի կաշառք է վերցրել և այլն, սակայն ոչ մի արդյունք ու դրական տեղաշարժ չկա համայնքապետի անօրինականությունները կանխելու հետ կապված:
Լրատվամիջոցի հետ զրույցում Քննչական կոմիտեից հաստատել են, որ քրեական գործեր կան հարուցված Կարո Բաղդասարյանի դեմ:
«Քննչական կոմիտեում Կարո Բաղդասարյանի դեմ 179 և 308-րդ հոդվածներով քրեական գործեր կան հարուցված»,-ասել Է Քննչական կոմիտեի մամուլի խոսնակ Նաիրա Հարությունյանը:
Գյուղապետից դժգոհող բնակիչները նշել են նաև, որ իրենց բողոքը տեղ չի հասնում, քանի որ, ըստ իրենց տեղեկութունների՝ գյուղապետը «լավ» թիկունք ունի նախկին իշխանություններից, և այդ է պատճառը, որ այսքան անօրինականություններից հետո շարունակում է պաշտոնավարել այնպես, ինչպես ցանկանում է: Բնակիչները մտահոգություն ունեն, որ քանի դեռ նրա լիազորությունները գոնե ժամանակավորապես չեն դադարեցվել, նա կարող է միջամտել գործի քննությանը՝ օգտագոծելով իր դիրքը:
ArmDay .am-ը փորձել է մեկնաբանություն ստանալ նաև համայնքապետից, սակայն հեռախոսազանգերը մնացին անպատասխան:
Նշենք, որ Կարո Բաղդասարյանը Կարբի համայնքը ղեկավարում է 2012 թվականից:
