Ցուցարարները թույլ չտվեցին փաստաբանին մտնել դատարան, վերջինս կդիմի դատախազություն
Քիչ առաջ Երևանի Շենգավիթ վարչական շրջանի ընդհանուր իրավասության դատարանի մոտ ցուցարարներն արգելել են փաստաբան Էրիկ Ալեքսանյանին մուտք գործել դատարան: Վերջինս խնդրել է մտնել և ստանալ համապատասխան ակտը, որը շատ կարևոր է իր պաշտպանյալի գործի համար: Ցուցարարները փաստաբանին թույլ չեն տվել ներս մտնել: Ցուցարարներից մեկն ասել է.
«Ձեր պաշտպանյալի իրավունքները խախտվել են, որովհետև Հայաստանում արդարադատություն չկա, մենք փակել ենք, որպեսզի վերականգնվի արդարադատություն, երբ որ վերականգնվի, կգաք, ձեր ակտը կստանաք»:
«Իմ պաշտպանյալի փոխարեն կարող էր լինել ձեզանից յուրաքանչյուրը»,-ասել է փաստաբանը:Բայց ցուցարարները նրա ՝ մուտք գործելու ցանկությունն այդպես էլ չեն իրականացրել:
Հեռանալուց առաջ փաստաբանը լրագրողների հետ զրույցում ասել է,որ համապատասխան դիմում են պատրաստվում ներկայացնել գլխավոր դատախազություն, որպեսզի համապատասխան քրեաիրավական որակում տրվի համապատասխան գործողություններին:
