Ռոբերտ Քոչարյանի պաշտպանական խմբից արտահոսքի մասին լուրը բացահայտ սուտ է. պաշտպանական խումբ

Ռոբերտ Քոչարյանի պաշտպանական խումբը պաշտոնապես հայտնում է, որ տարածված տեղեկությունն առ այն, թե պաշտպանական խմբից արտահոսք է եղել դատական ակտը Վերաքննիչ դատարանի դատավորների կողմից գրելու վերաբերյալ, բացահայտ սուտ է, իրականությանը չի համապատասխանում: Ինչ վերաբերում է դատական ակտի հրապարակման հետ միաժամանակ Ռոբերտ Քոչարյանի՝ քրեակատարողական հիմնարկից դուրս գալուն, ապա այդ պնդումը ևս սուտ է, քանի որ տասնյակ լրատվամիջոցներ որոշման հրապարակելուց հետո գնացել են Ազգային անվտանգության ծառայության շենքի մոտ և նրանց իսկ կողմից կատարված ուղիղ տեսանկարահանմամբ արձանագրվել է, թե երբ և ինչպես է Ռոբերտ Քոչարյանն ավտոմեքենայով դուրս գալիս ԱԱԾ շենքից: Նշենք, որ լրատվամիջոցներում տեղեկություններ էին հայտնվել, թե Ռոբերտ Քոչարյանի պաշտպանական խմբից արտահոսք է եղել՝ Ռոբերտ Քոչարյանի ազատ արձակելու որոշումը գրել են Վերաքննիչ դատարանի երեք դատավորներ՝ Վազգեն Ռշտունին, Արշակ Վարդանյանը և Մխիթար Պապոյանը, իսկ գործով նախագահող դատավոր Դավիթ Գրիգորյանը միայն կարդացել է այն: