Գագիկ Ծառուկյանի ուղերձը

Ինձ համար երբեք ընդունելի չեն եղել եւ չեն լինելու ավանդապահ հայ օջախին անհարարիր ցանկացած դրսեւորում: Այս մասին ասված է ԲՀԿ առաջնորդ Գագիկ Ծառուկյանի՝ Ընտանիքի օրվանն նվիրված շնորհավորական ուղերձում: Ուղերձում, մասնավորապես, ասվում է. «Սիրելի՛ հայրենակիցներ, ամբողջ աշխարհում այսօր նշվում է Ընտանիքի միջազգային օրը: Ոչ մեկի համար գաղտնիք չէ, որ կայուն եւ ամուր ընտանիքներն են յուրաքանչյուր երկրի ու պետության հիմնասյունը: Ես միշտ նշել եմ, որ ընտանիք, օջախ, եկեղեցի հասկացություններն ինձ համար բացարձակ արժեք են եւ բացառիկ նվիրական նշանակություն ունեն: Ընտանիքը յուրաքանչյուր հայի համար սրբություն է: Հենց հայկական ավանդական ընտանիքներում են դաստիարակվում ազգային արժեհամակարգ դավանող սերունդները, որոնք էլ հանդիսանում են մեր հայ ազգի շարունակականության ամենակարեւոր գրավականը: Ես միշտ ասել եմ, որ դաստիարակված լինելով մեր բազմադարյա ավանդույթներով առաջնորդվող հայ ընտանիքում, առաջնորդվելով մեր քրիստոնեական հավատքով ու ազգային արժեհամակարգով՝ ես միշտ եղել ու շարունակելու եմ լինել ավանդական հայ ընտանիքի կողմնակից, եւ ինձ համար երբեք ընդունելի չեն եղել եւ չեն լինելու ավանդապահ հայ օջախին անհարարիր ցանկացած դրսեւորում: Շնորհավորելով Ընտանիքի միջազգային օրվա առթիվ՝ բոլոր ընտանիքներին մաղթում եմ փոխադարձ սիրո եւ հարգանքի մթնոլորտում երկար տարիների երջանիկ կյանք: Ընտանեկան ջերմություն, բարեկեցություն, բարգավաճում եւ խաղաղություն աշխարհի բոլոր հայ օջախներին: