10 զոհերից 7-ի սպանությունը ո՛չ ոստիկանների կողմից է, ո՛չ էլ բանակի․ Քոչարյանը դատարանում

Զինվորական կառավարման նոր կայազորի կազմակերպումը և բանակային ստորաբաժանումների տեղաշարժը որևէ ընդանուր բան չունեն Քրեական օրենսգրքի 300.1 հոդվածի հետ, մինչև 2008թ.-ի Մատի 1-ը Զինված ուժերը Երևանում չեն օգտագործվել, այսօր դատարանում՝ Ռոբերտ Քոչարյանի խափանման միջոցի վերաբերյալ դատական նախնական նիստում, պաշտպանական կողմի դիրքորոշումը ներկայացնելիս հայտարարեց փաստաբան Հայկ Ալումյանը։ «Մինչև 2008թ.-ի Մարտի 1-ն ինչ տեղաշարժ որ կատարվել է՝ զորամասերից առանձին անձնակազմի ինչ-որ ուրիշ զորամաս տեղափոխումը, զինված ուժերի օգտագործում չէ։ Մինչև Մարտի 1-ը Զինված ուժերը չեն օգտագործվել, այլ տեղափոխվել են։ Զորքի օգտագործում չի եղել։ Այն, ինչ մեղադրանքում ներկայացված է, բացարձակապես իրականությանը չի համապատասխանում», - ավելացրեց փաստաբանը։ ՀՀ երկրորդ նախագահ Ռոբերտ Քոչարյանն էլ դատարանում խոսեց Մարտի 1-ի 10 սպանությունների մասին. «10 զոհերից 7-ի սպանությունը ո՛չ ոստիկանների կողմից է, ո՛չ էլ բանակի: Կա՞ն ձերբակալվածներ, կա՞ն քննչական գործողություններ այդ որոշ մարդկանց գտնելու ուղղությամբ»,- ասաց Քոչարյանը: