ՀՀ իշխանությունները Լարսի անցակետին այլընտրանքային ճանապարհ են դիտարկում ծովային փոխադրումները, և թեև քննարկվում է լաստանավի տարբերակը, բայց շատ ավելի դիտարկելի է երկաթուղային փոխադրումների համար կոնտեյներային փոխադրումները՝ Երևանից Փոթի։ Այս մասին այսօր ասուլիսի ժամանակ ասաց «Իմ քայլը» խմբակցության պատգամավոր Արմեն Փամբուխչյանը։ «Լաստանավի օգտագործումը քննարկվել է, այս պահին ունենք մեկ լաստանավ, որը օգտագործում է Հարավկովկասյան երկաթուղիներ ՓԲԸ-ն, և որը, սակայն, անսարքության պատճառով չի կարող սպասարկել տնտեսվարողներին»,-ասաց նա։ Պատգամավորի խոսքով՝ այս պահին աշխատում է ծովային նավահանգիստ ունենալու օրենսդրական նախաձեռնության վրա, որի նպատակը՝ սեփական դրոշով նավեր ունենալն է, և որը բավական լավ ֆինանսական պայմաններով կիրականացնի փոխադրումներ։ «Նախաձեռնել ենք իդեան, որպեսզի իրականացնենք, որն իհարկե կարճաժամկետ չի, անտեղ պետք է միանալ տարբեր կոնվենցիաների։ Օրենքը գրեթե ավարտին է հասցվում, պետք է անցնի իրավական և այլ փորձաքննություններ, հույս ունենք, որ կարճ ժամանակում կկարողանանք իրականացնել ծրագիրը և Փոթի նավահանգստում ունենալ սեփական նավը։ Աշխարհում 44 երկիր կա, որոնք չունեն ուղիղ ելք դեպի ծով, ՄԱԿ-ի կոնվենցիայով իրենց իրավունք է տրված, որ ունենան իրենց օրենսդրությունը և դառնան «ծովային երկիր»` իրենց ամենամոտ երրորդ երկրի միջոցով իրականացնեն ծովային փոխադրումներ։ Այդ դեպքում յուրաքանչյուր նավ պետք է անպայման ունենա որևէ երկրի դրոշ, նավերը գրանցի այդ երկրում, համապատասխանաբար վճարներ կատարի այդ երկրի բյուջե»,-ասաց նա։