Երևանի առաջին ատյանի դատարանը նախագահությամբ դատավոր Հայարփի Զարգարյանի վճիռ է կայացրել՝ պարտավորեցնելով «Եվրամիություն-Ասիա բիզնես ֆինանսական կենտրոն» հոլդինգի նախագահ Աշոտ Գրիգորյանին հրապարակայնորեն հերքել ՀՀ նախկին վարչապետ, Եվրասիական տնտեսական հանձնաժողովի նախագահ Տիգրան Սարգսյանի մասին զրպարտություն համարվող տեղեկությունները։ «Արմենպրես»-ի փոխանցմամբ՝ դատարանը պարտավորեցրել է Գրիգորյանին հերքումը տեղակայել մի շարք լրատվամիջոցներում։ Դատարանը նաև որոշել է հօգուտ Տիգրան Սարգսյանի բռնագանձել 1 մլն ՀՀ դրամ՝ որպես զրպարտության համար փոխհատուցման գումար։ Խնդրո առարկան մի շարք լրատվամիջոցներում «Նաիրիտ» գործարանի վերաբերյալ Աշոտ Գրիգորյանի հայտարարությունների հիման վրա հրապարակված նյութերն են, որոնք դատարանը համարել է զրպարտություն Տիգրան Սարգսյանի նկատմամբ ու Գրիգորյանին պարտավորեցրել է հերքել դրանք