Ունեիք ժողովրդի ավելի քան 90 տոկոսի աջակցությունը, հիմա որքա՞ն է․ հարց Փաշինյանին

«Դուք ունեիք ժողովրդի ավելի քան 90 տոկոսի աջակցությունը: Այժմ հաշվարկե՞լ եք՝ որքա՞ն է այդ աջակցության տոկոսը»,- ՀՀ վարչապետ Նիկոլ Փաշինյանին այս հարցով է դիմում РБК-ի լրագրողը: Ինչպես հայտնում է Shantnews-ը ՝ Փաշինյանը պատասխանում է. «Ես չեմ ստուգել, բայց կարծում եմ՝ ոչինչ չի փոխվել և չի փոխվելու, քանի որ վստահ եմ՝ ես մարդկանց հետ ազնիվ եմ, մենք աշխատում ենք բոլորի համար բացել բոլոր հնարավորությունները, նրանց համար չեն լինելու տնտեսական կամ քաղաքական սահմանափակումներ, յուրաքանչյուրը հնարավորություն է ունենալու իր տաղանդն իրացնել»: Լրատվականը հայտնում է՝ դիտարկմանը, թե տպավորություն է, որ իդեալիստն է խոսում, ՀՀ վարչապետն արձագանքում է. «Այդպես էլ կա: Իսկ գիտե՞ք՝ որն էր մեր հեղափոխության առանձնահատկություններից մեկը. դա ռոմանտիզմի հաղթանակն էր պրագմատիզմի նկատմամբ»: Հարցին՝ իրականությանը բախվելով չի՞ կոտրվել այդ ռոմանտիզմը, Փաշինյանն ասում է. «Ո՛չ, հիմա Հայաստանում ամեն ինչ այնպես էր, ինչպես կարծում էինք, և այդպես էլ շարունակելու ենք»: