ՏԵՍԱՆՅՈՒԹ. Նազենի Ղարիբյանը ֆինանսավորել է Օպերայի դեմ բողոք գրած մարդկանց. ԼՀԿ պատգամավոր. News am

Մշակույթի նախարարի պաշտոնակատար Նազենի Ղարիբյանը ֆինանսավորել է այն մարդկանց, ովքեր Օպերայի դեմ բողոք են գրել: Այս մասին այսօր ԱԺ-ում հայտարարեց «Լուսավոր Հայաստան» խմբակցության պատգամավոր Աննա Կոստանյանը՝ խոսելով Ալեքսանդր Սպենդիարյանի անվան Օպերայի և բալետի ազգային ակադեմիական թատրոնի գեղարվեստական ղեկավար և տնօրեն Կոնստանտին Օրբելյանին տնօրենի պաշտոնից ազատելու հրամանի շուրջ ստեղծված իրավիճակից: «Այս օրերին շրջանառվում է, որ թատրոնում հայտնաբերված 92 միլիոն դրամի պարտքը կամ կորուստը, որը հայտնաբերել են վերահսկիչ մարմինները, և որի մասին բարձրաձայնել է մշակույթի նախարարի պաշտոնակատար Նազենի Ղարիբյանը, կատարվել է 2014-2016 թվականներին, «Ալեքսանդր Սպենդիարյանի անվան Օպերայի և բալետի ազգային ակադեմիական թատրոնի աջակցման հիմնադրամի» կողմից, որը ստեղծվել է Օպերային կից: 92 միլիոն դրամի պակասուրդը կուտակվել է Օրբելյանից շատ առաջ, այսինքն՝ 2014-2016 թվականներին, մինչև Օրբելյանի նշանակումը, մինչդեռ Օրբելյանը նշանակվել է 2017 թվականին»,- ասաց ԼՀԿ պատգամավորը: Նրա տեղեկություններով՝ մի քանի օր առաջ Մշակույթի նախարարությունը, Նազենի Ղարիբյանի ղեկավարությամբ՝ ֆինանսական աջակցություն է ցուցաբերել տարբեր ֆոնդերի՝ տարբեր մշակութային ծրագրերի իրականացման համար, որոնց թվում նաև՝ Թատրոնի աջակցման հիմնադրամին, մինչդեռ մերժվել են այն ծրագրերը, որոնք ավելի արժանի են եղել ստանալու այդ ֆինանսական աջակցությունը: «Մշակույթի նախարարի պաշտոնակատար Նազենի Ղարիբյանը, որը հանդիսացել է հանձնաժողովի նախագահ, ֆինանսավորել է այն մարդկանց, ովքեր Օպերայի դեմ բողոք են գրել»,– ասաց նա։ Տեսանյութըՙ News am-ի: