Սերժ Թանկյանը՝ «Երևանից Ամուլսար՝ մասնակցելու մեծ հանրահավաքին» նախաձեռնության մասին

Նախաձեռնության հեղինակը Հայկական բնապահպանական ճակատն է: Մայիսի 11-ին Ջերմուկ համայնքը և բոլոր այն մարդիկ, ովքեր դեմ են Ամուլսարում մետաղական հանքի շահագործմանը, դուրս են գալու փողոց՝ վերահաստատելու ամիսներ առաջ իրենց կայացրած որոշումը՝ Ամուլսարը պիտի սար մնա, ջրերը ջինջ ու մաքուր պիտի հոսեն Սևանա լիճ, Վայոց Ձորի ու Սյունիքի մարզեր, իսկ Ջերմուկն էլ պիտի շարունակի մնալ Հայաստանի թիվ մեկ առողջարանային և զբոսաշրջային կենտրոն։ Թանկյանն իր ֆեյսբուքյան էջում գրել է. «Հայկական բնապահպանական ճակատը և Ջերմուկի բնակիչները երթ են կազմակերպում Վայոց ձորում և Ջերմուկում`վերահաստատելու իրենց բացասական վերաբերմունքը Ամուլսարի հանքավայրի վերաբերյալ: Հետաքրքրվողների և միանալ ցանկացողների համար ստորև ներկայացված են մանրամասները»: Գրառմանը կից երաժիշտը տեղադրել է միջոցառման մասին իրազեկող գրությունը: