«Յուքոմը» գրավադրել է 89 տոկոս բաժնեմասը․ Civilnet am
Civilnet am-ը գրում է, որ կապի հայաստանյան խոշոր օպերատոր «Յուքոմ» ընկերության բաժնեմասերի 89 տոկոսը 2018-ի մայիսից գրավադրված է երեք բանկերում՝ «Էյչ-Էս-Բի-Սի Բանկ Հայաստան»-ում (HSBC), «Արդշինբանկում» և «Ամերիաբանկում»։ Այդ մասին տեղեկանում ենք Հանրային ծառայությունները կարգավորող հանձնաժողովի 2018-ի մայիսի 18-ի որոշումից։ «Յուքոմը» փոխկապակցված է Ֆինանսների նախկին նախարար, Պետեկամուտների կոմիտեի նախկին նախագահ Գագիկ Խաչատրյանի ընտանիքի հետ։ Գագիկ Խաչատրյանի 3 որդիներին պատկանող բոլոր բաժնեմասերը գրավադրված են։ Գրավադրված է նաև «Յուքոմիե մեկ այլ խոշոր մասնակից «Այյու թելեքոմյունիքեյթ» ընկերության 29 տոկոս բաժնեմասը։ Այն գրավադրվել է HSBC-ում։ «Այյու թելեքոմնյունիքեյթը» գրանցված է Կիպրոսում։ Բայց սա «Յուքոմում» վերջին տարիներին եղած միակ փոփոխությունը չէ։ Կառավարության էլեկտրոնային ռեգիստրից կայքը տեղեկացել է, որ 2017-ի դեկտեմբերին «Յուքոմում» բաժնեմասեր է ձեռք բերել ռուսաստանաբնակ գործարար Սամվել Կարապետյանին պատկանող «Տաշիր գրուպի» խմբի մեջ մտնող «Ֆորա բանկը»։ 2018-ի մայիսից «Յուքոմի» բաժնետեր է դարձել նաև Սամվել Կարապետյանի քրոջ ամուսինը՝ Սուրիկ Պողոսյանը։ Ներկայում Սուրիկ Պողոսյանը նաև Հայաստանի էլեկտրական ցանցերի (ՀԷՑ) ընդհանուր հարցերով տնօրենն է։ ՀԷՑ-ի սեփականատերը ևս «Տաշիր գրուպն» է։ Սիվիլնեթը ընկերության բաժնետերերի ու բաժնեմասերի գրավադրման վերաբերյալ մի քանի հարց է ուղղել ընկերության տնօրեն ու բաժնետեր Հայկ Եսայանին.
«Եթե չեմ սխալվում, մենք անցյալ տարի գրավադրման որոշում չենք ունեցել։ Եթե եղել է, եղել է կապիտալ ներդրումների համար՝ ինչ ֆինանսական ռեսուրս վարկային միջոցներով ունենք ներգրաված, դա կապիտալ ներդրում է։ Ինչ վերաբերում է բաժնետերերի փոփոխությունններին, ապա եղել է, դա կարելի է գտնել ՀԾԿՀ կայքում։ Դուք կարող եք դիմել և տեղեկատվությունը պաշտոնապես ստանալ։ Այո՛, Սուրիկ Պողոսյանը ներդրում է կատարում ընկերությունում և կլինի բաժնետեր»։
Մանրամասները՝ Civilnet am կայքում
