Ապե՛ր, հլը դուրս արի. Ավագանու ԲՀԿ-ական անդամը` «Իմ քայլականին»
Երևանի ավագանու այսօրվա նիստում միջադեպ է գրանցվել «Իմ քայլը» և ԲՀԿ խմբակցությունների անդամների միջև:
Ավագանու ԲՀԿ խմբակցության անդամ Արմեն Ներսիսյանը նիստի ընթացքում տեղից վեր կացավ և դիմելով «Իմ քայլից» Վազգեն Դարբինյանին՝ ասաց. «Ապե՛ր, հլը դուրս արի»:
Ավագանու ԲՀԿ խմբակցության անդամ Արմեն Ներսիսյանն իրեն երկար նայելու համար է դուրս հրավիրել Վազգեն Դարբինյանին: ԲՀԿ-ականները լրագրողների հետ զրույցում, մեկնաբանելով Արմեն Ներսիսյանի վարքագիծը, ասացին, որ այդտեղ որևէ վատ բան չկա, ընդամենը քննարկման հրավեր է:
Ավելի ուշ՝ նիստի ընթացքում, «Իմ քայլը» խմբակցության անդամ Լիլիթ Կիրակոսյանն առաջարկեց էթիկայի խորհուրդ ստեղծել: «Ինչպես ցույց տվեց մեր այսօրվա նիստը և առհասարակ բոլոր նիստերը, անհրաժեշտություն եմ տեսնում և առաջարկում եմ ստեղծել էթիկայի խորհուրդ, ինչպես ԱԺ-ում է: Այն կհսկի և´ ֆեյսբուքյան գրառումները, և´ նիստում հնչեցված «դուրս արի, ապե, խոսենք» արտահայտությունները»,- ասաց Լիլիթ Կիրակոսյանը:
Քաղաքապետը Հայկ Մարությանը նշեց, որ հետաքրքիր առաջարկ է. «Ինձ դուր է գալիս այս առաջարկությունը: Կարծում եմ՝ ձեռնամուխ կլինենք»:
Ավելի ուշ լրագրողների հետ զրույցում ԲՀԿ-ական պատգամավորը հայտնել է, որ որ ոչ ոքի հետ հաշիվներ չունի, ավելին՝ «ապերով» է դիմել «Իմ քայլի» անդամին:
«Ես ոչ մեկի հետ հաշիվներ չունեմ, ոչ էլ նպատակ ունեմ, թշնամանք չկա, զայրացա, երբ նկատեցի, որ ինձ երկար է նայում։ Ամեն անգամ էլ նման դեպքեր լինում է, դուք էլ եք նման ռեպլիկներ անում»,–ասել է նա լրագրողներին։
