«Վերցնողն ով էլ լինի, եթե մեղավորությունը հաստատվի` պետք է պատժվի օրենքի ողջ խստությամբ». Արսեն Թորոսյան

ՀՀ առողջապահության նախարար Արսեն Թորոսյանն անդրադառնալով իր տեղակալի ձերբակալման մասին ԱԱԾ տարածած հայտարարությանը, ֆեսբուքյան իր էջում գրել է. «Ամենևին կասկածի տակ չառնելով անմեղության կանխավարկածը, ուզում եմ հայտնել, որ վերցնողն ով էլ լինի, եթե գործի շրջանակներում մեղավորությունը հաստատվի` նա պետք է պատժվի օրենքի ողջ խստությամբ: Ինչ խոսք` նման երևույթներն անթույլատրելի են և դատապարտելի: Նոր Հայաստանում պետք է ձգտել բացառել և արդար աշխատանքով կառուցել մեր ապագան: Կաշառք տալը և վերցնելը մեր երկրում քրեորեն պատժելի արարք են»,–գրել է նախարարը: Արսեն Թորոսյանը գրել է, որ իր աջակցությունն է հայտնում իրավապահ մարմիններին` կոռուպցիայի դեմ պայքարում։ «Անկեղծորեն հավատում ենք, որ համակարգում տեղ գտած կոռուպցիայի և հակաօրինական այլ երևույթների բացահայտումը կօգնի արմատախիլ անել դրանք և առողջացնել համակարգը»,–նշել է Թորոսյանը: Նրա խոսքով` Առողջապահության նախարարության ողջ թիմը ցավ ու ափսոսանք է հայտնում կատարվածի համար: