ՏԵՍԱՆՅՈՒԹ. Ուրիխանյանը վարչապետին «ստիպեց» ներողություն խնդրել

Բարգավաճ Հայաստան Կուսակցության պատգամավոր Տիգրան Ուրիխանյանը վարչապետին «ստիպեց» ներողություն խնդրել: Ուրիխանյանը մասնավորապես ասել էր, որ այս տարի ՀՀ-ն պետք է սպասարկի 400 մլն դոլարից ավելի պետական պարտքի ակումուլացիա, իսկ հաջորդ տարի 800 մլն դոլարից ավելի, այն դեպքում, երբ Հայաստանի պետական բյուջեն 3 մլրդ-ից մի փոքր ավելի դոլար է կազմում, և հարցրել էր, թե ինչ հետևանքներ սա կարող է առաջացնել պետության համար, եթե չհաջողվի հասնել վճարման հետաձգման: Կարո՞ղ է Հայաստանին սպառնալ դեֆոլտի վտանգ, կամ նվազեն անշարժ գույքի գները»,- հարց ուղղեց Ուրիխանյանը: Նիկոլ Փաշինյանը ժպիտով արձագանքել էր, թե չի հասկանում` ինչու է այդպես թախծոտ ձայնով այդ հարցը տալիս: «Հասկանալի է, որ դա նորություն չէ, հասկանալի է, որ միջինժամկետ ծրագրով, բյուջեի ծրագրով այդ ամենը նախատեսված է: Ոչ, ձեր նշած որեւէ սպառնալիք Հայաստանին չի կարող սպառնալ: Ոչ, անշարժ գույքի գները ոչ թե նվազելու են, այլ բարձրանալու են: Բյուջեի եկամուտները ոչ թե նվազելու են, այլ ավելանալու են: Այս տարի, նվազագույնը 40 մլրդ դրամով ավելի գումար ենք հավաքելու բյուջե»,-հայտարարեց Փաշինյանը՝ հավելելով, որ տարբեր գնահատականներում Հայաստանում մինչեւ 50 տոկոս ստվեր կա»,- ասել է վարչապետը: Փաշինյանը նկատեց, որ հենց այս ստվերային գումարներով տարբեր կոռուպցիոն սխեմաներ են աշխատում: Ի պատասխան Ուրիխանյանն ասաց. «ԱԺ կանոնակարգը չի կանոնակարգում ԱԺ պատգամավորի ձայնի ելեւէջները: Բյուջեի կեսի չափ պարտք ունենք մարելու, բա թախիծ ա, բա ի՞նչ ա: Ես թախծոտ հարցեր տվել եմ բոլոր իշխանություններին»: Նիկոլ Փաշինյանն էլ ներողություն խնդրեց Ուրիխանյանից. «Եթե իմ խոսքում որեւէ ոչ պատեհ բան նկատեցիք, ես որեւէ նման բան նկատի չունեի: Ես պարզապես ուզում էի ձեր տրամադրությունը փոխել»: Տեսանյութը` News. am-ի: