«Գյումրին անսովոր քաղաք է». Արմեն Սարգսյան

Գյումրին պետք է նախ Հայաստանը ճանաչի, հետո՝ նաև միջազգային հանրությունը։ Այս մասին այսօր Գյումրիում ասել է ՀՀ նախագահ Արմեն Սարգսյանը։ Նա այսօր հերթական անակնկալ այցով Գյումրիում էր։ Արմեն Սարգսյանը շրջել է Գյումրիի պատմական փողոցներով և ևս մեկ անգամ նշել, որ այնպիսի ճարտարապետական ու մշակութային ժառանգություն ինչպիսին Գյումրիում կա, չկա անգամ աշխարհի շատ զարգացած քաղաքներում։ «Ամեն ինչի համար ժամանակ է պետք, չես կարող մի քանի ամսվա ընթացքում փոխել այսպիսի քաղաքը: Մի բանում վստահ եմ, որ այս քաղաքն ունի պատմություն, իսկ եթե ունի պատմություն, ուրեմն ունի նաև ապագա: Այսպիսի գեղեցիկ փողոցներ չկան անգամ Երևանում: Պետք է, իմ հնարավորության սահմաններում, ամեն ինչ անեմ, որ Գյումրիի պատմական կենտրոնը չփչանա: Բոլորս անելիք ունենք և՛ կառավարությունը, և՛ գործարարները, և՛ մտավորականները, և՛ արվեստագետները: Գյումրին պետք է գրավիչ դառնա՝ որպես մշակույթի, արվեստի, արհեստների քաղաք: Գյումրին սովորական քաղաք չէ, Գյումրին անսովոր քաղաք է»,- SHANTNEWS. am-ին ասել է ՀՀ նախագահ Արմեն Սարգսյանը: Ըստ նախագահի` միայն բնակարան կառուցելը բավարար չէ, Գյումրիում կյանքի որակը պետք է լավացնել։ ՀՀ նախագահը ծանոթացել է Կումայրի միջուկում կառուցվող մշակութային կենտրոնի շինարարության ընթացքին, թեյել է արդեն իր սիրելի վայրը դարձած «Արեգակ» ներառական փուռ-սրճարանում, իսկ Սուրբ Նշան եկեղեցում մասնակցել է ժամերգության: