Քրեական հեղինակություն Նորագյուղցի Բոգոյի (Ռուբեն Կոստանյան) մտերիմները նրա իրերը Կենտրոնական ավտոկայանից հանելուց հետո սենյակները պարզապես ավերակի են վերածել: «Հայկական ժամանակ»-ի տեսախցիկը ֆիքսել է սենյակների վիճակը, որն անվանել է վանդալիզմ: Նշենք, որ Կոստանյանը տարիներ շարունակ պետական շինություն հանդիսացող Կենտրոնական ավտոկայանի ներսում՝ 2-րդ հարկում, «սեփական» սենյակ եւ հյուրանոց է ստեղծել՝ ապօրինի: «Հայավտոկայարան» ՓԲԸ-ի գործադիր տնօրեն Աշոտ Մնացականյանի խոսքով՝ այդ տարածքները վարձակալված չեն եղել, քանի որ նման պայմանագրեր չկան: Ոստիկանության 6-րդ վարչությունն էլ մարտի 11-ին գնացել էր Կենտրոնական ավտոկայան ոչ միայն «զավթված» տարածքը ազատելու, այլեւ գործողություններ էին իրականացնում՝ պարզելու համար, թե արդյո՞ք ավտոկայանի հարակից շրջաններում գործող տնտեսվարողները հոսանքն ապօրինի են օգտագործել, քանի որ Կենտրոնական ավտոկայանում շարունակաբար վճարել են հարյուր հազարավոր դրամների հասնող հոսանքի վարձ։ Լրատվականի փոխանցմամբ՝ մարտի 12-ին Բոգոյի մտերիմները այնտեղից հանում էին նրա իրերը, սակայն պարզվում է, որ միայն իրերը չէ, որ հանել են: Բոգոյի կողմից տարիներ շարունակ զբաղեցված տարածքի պատերը ամբողջովին քանդել են, իսկ հոսանքի լարերը եւ անգամ վարդակները բոլորը պոկել են: Պատերին սուրճ են լցրել, առաստաղն ավերակի վերածել: