![ԼՈՒՍԱՆԿԱՐ. 07-ով վրաերթի են ենթարկել 58–ամյա հետիոտնին,վերջինս տեղում մահացել է](https://auroranews.am/storage/img/base_image/old/a1ab54ec4e3e41a317eca96e2891e053.webp)
ԼՈՒՍԱՆԿԱՐ. 07-ով վրաերթի են ենթարկել 58–ամյա հետիոտնին,վերջինս տեղում մահացել է
![ԼՈՒՍԱՆԿԱՐ. 07-ով վրաերթի են ենթարկել 58–ամյա հետիոտնին,վերջինս տեղում մահացել է](https://auroranews.am/storage/img/base_image/old/a1ab54ec4e3e41a317eca96e2891e053.webp)
Մահվան ելքով վրաերթ է տեղի ունեցել Արարատի մարզում: Այսօր ժամը 01:00-ի սահմաններում անհայտ մակնիշի և համարանիշի ավտոմեքենայի վարորդը Արտաշատ քաղաքի Օգոստոսի 23-ի փողոցի թիվ 97 տան դիմաց վրաերթի է ենթարկել Արտաշատ քաղաքի բնակիչ, 58-ամյա Գագիկ Մաթևոսյանին: Այս մասին տեղեկանում ենք shamshyan. com-ից:
Ինչպես հայտնում է ֆոտոլրագրող Գագիկ Շամշյանը, վարորդը դեպքի վայրից դիմել է փախուստի, իսկ հետիոտնը տեղում մահացել է:
Ֆոտոլրագրողի տեղեկություններով՝ ոստիկանության Արտաշատի բաժնի ծառայողները պարզել են, որ վրաերթը կատարվել է ВАЗ 21 07 մակնիշի 35 GՍ 165 համարանիշի ավտոմեքենայով:
Մինչ ոստիկաններն ու քննիչները կմեկնեին նշված ավտոմեքենայի հետևից, ոստիկանություն է ներկայացել Արարատի մարզի Նորաշեն գյուղի բնակիչ, 64-ամյա Վրեժ Վարդանյանը և հայտնել, որ վրաերթը ինքն է կատարել, իսկ դեպքի վայրից հեռացել է, քանի որ վախեցել է, որ վրաերթի ենթարկվածի հարազատները հնարավոր է՝ վրեժխնդիր լինեն իր նկատմամբ: Ավտոմեքենան քննիչի որոշմամբ տեղափոխվել է ոստիկանության Արտաշատի բաժնի պահպանվող հատուկ տարածք:
Գ. Շամշյանի տեղեկություններով՝ ոստիկաններն ու քննիչները ունեն կասկածներ, որ հնարավոր է՝ Վ. Վարդանյանի փոխարեն մեկ ուրիշն է եղել վարորդը: