«Գազպրոմ Արմենիա»-ն սաբոտաժ չի անում․ պարզաբանում հունվարին սպառած գազի դիմաց վճարած գումարի մասին
«Ջեռուցման ժամանակաշրջանում որոշ բաժանորդների կողմից դժգոհությունները կրկնվում են` կապված սպառված բնական գազի դիմաց վճարվող գումարների հետ: Այսինքն սա եղել է նախկին ջեռուցման ժամանակաշրջանում եւ դրանից էլ առաջ եւ առաջին անգամը չէ»,- այս մասին «Հայկական ժամանակ»-ի հետ զրույցում ասել է «Գազպրոմ Արմենիա» ընկերության հասարակայնության եւ ԶԼՄ-ների հետ կապերի ծառայության աշխատակից Միխայիլ Հարությունյանը:
Նշենք, որ վերջին օրերին սոցցանցերում օգտատերերը ակտիվորեն քննարկում են, որ հունվար ամսին` դեկտեմբերի համեմատ, սպառած գազի դիմաց անհամեմատ ավելի շատ գումար են վճարել: Քաղաքացիները պնդում են նաեւ, որ բնակարանի ջեռուցման համակարգում կարգավորումների ոչ մի փոփոխություն չի եղել: Մարդկանց մի մասն էլ սա կապում է ՀՀ սահմանին գազի գինը թանկանալու հետ եւ նշում, որ սա սաբոտաժ է:
«Բաժանորդների մոտ այդ որոշակի սպառման ծավալների ավելացումը հիմնականում պայմանավորված է արտաքին օդի ջերմաստիճանում: Այսինքն, դրանով պայմանավորված մեծանում է բնակարանների, տների` արտաքին պատերի ջերմային կորուստները: Եւ այդ ջերմային կորուստները պետք է փոխհատուցվեն ավելի շատ քանակությամբ գազի սպառման ծավալում»,- լրատվամիջոցի հետ զրույցում ասել Հարությունյանը ՝հավելելով, որ «Գազպրոմ Արմենիա» ընկերությունը պատրաստ է յուրաքանչյուր բողոքին անհատապես անդրադառնալ` ներկայացնելով սպառման պատմությունը` նախորդ տարիների համեմատականը տեսնելու համար:
«Այսինքն, յուրաքանչյուր բաժանորդի յուրաքանաչյուր բողոքին մենք պատրաստ ենք անդրադառնալ եւ արձագանքել: Ցանկացած խնդրի դեպքում բաժանորդները ոչ միայն կարող են, այլ նաեւ պետք է դիմեն «Գազպրոմ Արմենիա» ընկերությունը` իրենց բարձրացրած հարցերի պատասխանները կամ խնդիրների լուծումը ստանալու համար»,- ասաց Հարությունյանը:
Լրատվականը նկատել է, որ հանրությունը քննարկում է, թե սա սաբոտաժ է եւ կապ ունի սահմանում գազի գնի բարձրացման հետ, Հարությունյանն արձագանքեց. «Մենք կտրականապես անհամաձայն ենք այդպիսի պնդումների հետ եւ չենք պատրաստվում դա մեկնաբանել»:
