Վերջին 10 տարիներին մեքենաների քանակը բազմապատկվել է 2-2.5 անգամ: Այս մասին այսօր լրագրողների հետ զրույցում ասաց «Վարորդի ընկեր» հասարակական կազմակերպության համահիմնադիր Սերգեյ Ղահրամանյանը: Եթե 10 տարի առաջ 10, 15, առավելագույնը 20 հազար մեքենա էր ներկրվում, ապա 2018 թ. 70 հազարից ավելի մեքենա է ներկրվել: «Վարորդի ընկեր» ՀԿ համահիմնադիրը նկատում է, որ մեքենաների թվաքանակի ավելացմանը զուգահեռ նոր ճանապարհներ մայրաքաղաքում շատ քիչ են կառուցվել: «Միայն Մոնթե Մելքոնյան փողոցն է երևի: Ամեն օր 350-400 մեքենա է Երևանում երթևեկում, և դրան գումարվում է վարորդական վկայականների ստանալու ձևերը, անփորձ վարորդներ: Այս ամենը հանգեցրեց վթարների շատացմանը, ՃՏՊ-ների քանակի ավելացմանը»,- նշեց նա: Պատահարների թիվը 2018 թ. նոյեմբերի 30-ի դրությամբ կազմել է 61 հազար՝ 2017 թ. 53 հազարի համեմատ: «Միանշանակ ասել, որ մեքենաների քանակն է դեր խաղում ՃՏՊ-ների ավելացման հարցում, սխալ է: Ապրիլ-մայիսից հետո ոստիկանությունը որդեգրեց մեղմ քաղաքականություն, և դա բերեց որոշ վարորդների՝ օրենքից դուրս նայելուն: Խախտում անող վարորդներն ասում են՝ մենք հեղափոխություն ենք արել, որ մեզ տուգանեք: Այսինքն՝ մեղմ քաղականություն կոչվածը մարդիկ այլ կերպ ընկալեցին»,-նշեց նա: