Պատրաստ ենք նոր տարվա օրերին էլ գործադուլ ու նստացույց անել

Կառավարության դիմաց բողոքի ակցիա իրականացնող ՀՀ սփյուռքի և մշակույթի նախարարության աշխատակիցներին հանդիպեց կառավարության նամակաների բաժնի պատասխանատուն՝ խոստանալով նրանց բաց նամակը փոխանցել վարչապետի պաշտոնակատարին: Նախարարությունների ներկայացուցիչները խնդրեցին մինչև երկուշաբթի պատասխանել նամակին, այլապես գործադուլը կշարունակեն: Նրանք հանդիպում պահանջեցին վարչապետի պաշտոնակատարի հետ, որովհետև նախագիծն ընդունվել է, օրենքն էլ առանց քննարկումների հունվարի 1-ից ուժի մեջ է մտնում: «Եթե մեր բողոքին ընթացք չտրվի, պատրաստ ենք նոր տարվա օրերին էլ գործադուլ անել, նստացույց էլ կանենք», - նշեց աշխատակիցներից մեկը: Հիշեցնենք, որ այսօր վաղ առավոտից մշակույթի և սփյուռքի նախարարությունների աշխատակիցները գործադուլ են հայտարարել՝ բողոքելով օպտիմալացման դեմ: Նշենք, որ հնարավոր է Մշակույթի նախարարությունը միավորվի կրթության և գիտության նախարարությանը, իսկ սփյուռքի նախարարությունը կարող է լուծարվել: