Ո՞վ կարող է ասել, թե Հայաստանում այսօր քանի՞ ընտրող կա: Եկեք մոնիթորինգ անենք ու տեսնենք վերջին տարիների ընտրություններից հետո ինչ է խոսվել ու շեշտվել այն օրերի ընդդիմության, միջազգային կառույցների կողմից: Այս մասին «Իմ քայլը» դաշինքի շտաբում, լրագրողների հարցերին ի պատասխան ասաց ՀՀ վարչապետի պաշտոնակատար, դաշինքի առաջին համար Նիկոլ Փաշինյանը՝ անդրադառնալով հարցին, թե ինչու՞ է գրանցվել ընտրությունների մասնակցության ցածր ցուցանիշ: «Այդ թիվը բացակա ընտրողներն են, մահացած ընտրողներն են, մարդիկ են, որ երկրում չեն: Ի վերջո, չմոռանանք, որ մարդիկ իրենց կամքով գնացել են ընտրության, նրանց չեն տարել: Եւ հետո, մարդիկ ինտրիգ չեն տեսնում այս ընտրություններում, որովհետեւ տան անդամը, հարեւանը, բարեկամը, վերեւի հարեւանը, աշխատանքի գործընկերները, ընկերուհիները քվեարկում են «Իմ Քայլը» դաշինքի օգտին, ասում է՝ դե էսօր ցուրտ է, ես էլ կմնամ տանը»: