Վանեցյանն ո՞վ է․ Լևոն Բարսեղյանին թույլ չեն տվել մտնել Գյումրու քաղաքապետարան

Գյումրու ավագանու անդամ Լևոն Բարսեղյանին թույլ չեն տվել մտնել քաղաքապետարան, այդ մասին Բարսեղյանը ֆեյսբուքյան իր էջում հայտնել է դժգոհություն: «Կարապետյան Հովհաննես անուն-ազգանունով մի ջահել, որ ներկայացավ որպես վարչապետի անվտանգության ծառայության աշխատակից, ԱԱԾ-ից, ինձ Գյումրու քաղաքապերարան թույլ չտվեց մտնել։ Բացատրեցի, որ ես ավագանու անդամ եմ, այս շենքում ավագանու նստավայրն է, որտեղ ես օրենքով ազատ ելումուտի իրավունք ունեմ։ Ասաց կառավարության նիստ է, ձեր անունը ցուցակում չկա։ Բացատրեցի, որ ես նիստի չեմ գնում, ես մեր նստավայրն եմ գնում։ Ջահելը անդրդվելի եղավ։ Հիմա Վանեցյանն ո՞վ է սրանից հետո։ Հասարակ գեբեշնիկ։ Դրանից առաջ էլ էր։) Հետաքրքիր է քաղաքապետին ներս թողե՞լ են», - գրել է Լևոն Բարսեղյանը։ Նշենք, որ այս պահին Գյումրու քաղաքապետարանում ընթանում է կառավարության արտագնա նիստը՝ երկրաշարժի 30-րդ տարելիցի կապակցությամբ։