ԲԷՑ-ում մոտ 160 աշխատակից կկրճատվի, ատոմակայանում էլ չարաշահումներ կան․ Էներգետիկայի նախարար

ԲԷՑ-ում մինչև 160 աշխատակից կկրճատվի: Այս մասին կառավարության այսօրվա նիստից հետո հայտնել է Էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը։ Նրա խոսքով՝ այնտեղ ակտիվ աշխատանքներ են իրականացվում պաշտոնանկությունների հետ կապված: «Երկու օր առաջ ընտրություն է եղել և ընտրվել է նոր տնօրեն, այսօր կներկայացնենք: Շուտով կհաստատենք նաև ԲԷՑ-ի հաստիքացուցակը, որտեղ նախատեսվում է շուրջ 100-160 աշխատակիցների կրճատում, որոնք կարելի է ասել՝ այդքան էլ զբաղված չէին ԲԷՑ հիմնական գործունեությամբ: Հազար հաստիքացուցակով 163 ազատ հաստիքների պարագայում ունենք 90 արտահաստիքային պայմանագրային աշխատողներ: Անհասկանալի է՝ եթե ունենք ազատ հաստիքներ, ինչո՞ւ են արտահաստիքային աշխատող պահում»,- ասաց Բաղրամյանը: Անդրադառնալով ատոմակայանին վերաբերող խնդիրներին՝ Գարեգին Բաղրամյանը նշել է, որ այստեղ այժմ ուսումնասիրություններ են գնում: Այն չարաշահումները, որոնք հայտնաբերվել են, վերաբերում են ընթացիկ նորոգման հետ կապված աշխատանքներին: Խոսքը 33 մլն դրամ չարաշահման մասին է։