BBC լրատվական գործակալությունը ծավալուն անդրադարձ է կատարել Սպիտակի աղետալի երկրաշարժի ժամանակ Հայաստանին օգնություն ցուցաբերած բրիտանացի փրկարարների մասին, որոնք աղետից 30 տարի անց Հայաստան են եկել: Նշենք, որ 1988 թ. դեկտեմբերին Հայաստանին օգնության հասան արեւմտյան շատ երկրների փրկարարական թիմեր: Նրանց թվում էին նաեւ 23 հրշեջ-փրկարարներ Անգլիայի Լանկաշիր կոմսությունից: Ստորեւ ներկայացնում ենք լրատվամիջոցի անդրադարձից հատվածներ: Վերակառուցման շրջանն էր, իսկ ԽՍՀՄ գլխավոր քարտուղար Միխայիլ Գորբաչովը երկրաշարժի ժամանակ ԱՄՆ-ում էր , որտեղ էլ կոչ արեց արեւմտյան երկրներին օգնել խորհրդային Հայաստանին: «Գորբաչովի կողմից միջազգային օգնություն խնդրելն անսովոր բան էր, անսովոր էր, որ արեւմտյան փրկարարները հրավիրվեցին Խորհրդային Միություն», - հիշում է Փոլ Բերնսը: «Ես կարծում եմ, որ տեղացիներն էլ էին զարմացած, որ Արեւմուտքն եկել է նրանց օգնելու»: «Մենք գոնե մարդկանց հնարավորություն տվեցինք իրենց սիրելիներին քրիստոնյային հարիր ձեւով հողին հանձնել», - ասում է բրիտանացի փրկարար Ռեջի Բերրին` նայելով Սպիտակ քաղաքի հայկական գերեզմանատանը գտնվող տապանաքարերին: 30 տարի առաջ նա իր հրշեջ ընկերի հետ այստեղ էր՝ Սպիտակում՝ մարդկանց փրկելու համար: Սակայն նրանց բաժին հասան միայն մարմիններ… բազում մարմիններ… Այդ անձնակազմի երկու անդամներ` հրամանատար Փոլ Բերնսը եւ հրշեջ Ռեջի Բերրին, BBC- ի եւ Հայաստանի Հանրային ռադիոյի թղթակիցների հետ միասին, երեսուն տարի անց Սպիտակում են եղել: Իռլանդացի Բերնսը եւ իր ընկերները հավաքվել են երկու օրվա ընթացքում: Բնականաբար ունեին համապատասխան սարքավորումներ, սննդամթերք, տաք հագուստ՝ բաճկոններ, վերարկուներ, գուլպաներ, քնապարկեր, որոնք նրանց տրվել էին Սառը պատերազմում ԽՍՀՄ մեկ այլ ոչ յուրային երկրի ներկայացուցիչների կողմից` Լիվերպուլի մոտակայքում գտնվող Բերտոնվուդի բազայի ամերիկացի զինվորականների կողմից: