Ռուսաստանն Ադրբեջանին չի մատակարարի «Բալ-Է» հրթիռային համալիր

Ռուսաստանի Դաշնության իշխանությունները հրաժարվել են Ադրբեջան մատակարարել «Բալ-Է» առափնյա հրթիռային համալիրը: Այս մասին հայտնում է kommersant.ru-ն։ Լրատվամիջոցի փոխանցմամբ՝ ռուսական կողմը եկել է այն եզրահանգմանը, որ տվյալ համալիր հրթիռի՝ նույնիսկ արտահանման համար նախատեսված տարբերակը հավանական սպառնալիք է ներկայացնում ՌԴ տարածքային ջրերում գտնվող Կասպյան նավատորմի նավերի համար: Հայտնի է, որ Ադրբեջանը «Բալ-Է» առափնյա հրթիռային համալիրի գնմամբ հետաքրքրված էր դեռևս 2014թ.: Եվս մի բարձրաստիճան աղբյուր հաստատել է, որ «Բալ-Է»-ի մատակարարման հարցն այժմ չի քննարկվում Ադրբեջանի զինված ուժերի հետ, քանի որ կա «աշխարհաքաղաքական նրբություն»: Վերջին տարիներին համալիրի X-35 դասի հրթիռի ինքնանշանառման գլխիկն արդիականացվել է ոչ միայն ծովային, այլև ցամաքային թիրախների խոցման համար: «Մենք չէինք ցանկանա, որ տվյալ զինատեսակը կիրառվի ղարաբաղյան հակամարտությունում»,-մանրամասնել է լրատվամիջոցի զրուցակիցը: Մոսկվան էական վնաս չի կրի տվյալ գործարքի չեղարկումից. վերջին տարիներին Բաքուն 5 մլրդ դոլարի ռուսական զենք և ռազմական տեխնիկա է գնել։ Գործարքի չեղարկումից չեն տուժի նաև ռուս-ադրբեջանական հարաբերությունները։