Հայաստանը ոչ մեկին ոչ մի խնդրանքով չի դիմել․ Փաշինյանը հակադարձում է Պուտինի օգնականին
Հայաստանը ոչ մեկին ոչ մի խնդրանքով չի դիմել, ոչ էլ առաջարկությամբ։ Այս մասին այսօր քարոզարշավի ընթացքում հայտարարել է վարչապետի թեկնածու Նիկոլ Փաշինյանը։
«Մենք ասել ենք, որ մենք ունենք մեր թեկնածուն ՀԱՊԿ-ում և մենք հետևողական շարունակում ենք բանակցել մեր թեկնածուի շուրջ»,- ասել է նա։
Հատկանշական է, որ Փաշինյանը օրեր առաջ տեղի ունեցած քարոզարշավի ժամանակ լրագրողներին հայտնել էր, որ ՌԴ նախագահ Վլադիմիր Պուտինի հետ հեռախոսազրույց է ունեցել, որի ժամանակ Ռուսաստանի առաջնորդն առաջարկել է ՀԱՊԿ գլխավոր քարտուղարի ընտրության հարցը թողնել գալիք տարվան, ինչին, ըստ Փաշինյանի, ինքը չի առարկել, համաձայնել է։
Հիշեցնենք, որ նախօրեին ՌԴ նախագահի օգնական Յուրի Ուշակովը լրագրողների հետ զրույցում հայտնել են, որ Հավաքական անվտանգության պայմանագրի կազմակերպության գագաթնաժողովը հետաձգվել է Հայաստանի խնդրանքով՝ պայմանավորված երկրում անցկացվելիք ընտրություններով:
Դրանից հետո վարչապետի պաշտոնակատարի մամուլի խոսնակ Արման Եղոյանը Ուշակովի հայտարարությունը հերքել էր։
