Կենսաթոշակի համար վճարվող 2,5 % հարկը կրկին կդառնա 5 %
Կենսաթոշակային համակարգին միացած քաղաքացիները 3-4 տարուց իրենց մասնաբաժինը կվճարեն ոչ թե 2,5 տոկոս, ինչպես որոշել էր նոր կառավարությունը, այլ՝ 5 տոկոս:
Այս մասին այսօր ֆինանսների նախարարությունում հայտարարեց ֆինանսների նախարարի տեղակալի պաշտոնակատար Արման Պողոսյանը: 5 տոկոս մասնակցությունը կլինի այն ժամանակ, երբ եկամտահարկի շեմը ներկայումս գործող 23 տոկոսից դառնա 20 տոկոս:
Հիշեցնենք, որ նախագծով նախատեսվում էր կուտակային պարտադիր համակարգին մասնակցող և հուլիսի 1-ից դրան միացող քաղաքացիների եկամտի 10 տոկոսի կուտակումը ձևավորել 2.5 և 7.5 տոկոս համամասնությամբ. այսինքն` 2.5 տոկոսը կվճարի քաղաքացին, 7.5 տոկոսը` պետությունը:
