ՏԵՍԱՆՅՈՒԹ․Չկաշկանդվել ոչ մեկի ո՛չ կարողությունից, ո՛չ դիրքից․ Օսիպյանը՝ Կոտայքի ոստիկաններին

«Գործել համարձակ ու չկաշկանդվել ոչ մեկի ո՛չ կարողությունից, ո՛չ էլ դիրքից՝ բացառելով խտրական վերաբերմունքը...»,- նման պահանջով է հանդես եկել ՀՀ ոստիկանության պետի պաշտոնակատար Վալերիյ Օսիպյանը՝ Կոտայքի ոստիկանների հետ աշխատանքային հանդիպման ժամանակ։ Նշենք, որ ոստիկանության պետը Ծաղկաձորում հանդիպել է դեկտեմբերի 9-ին կայանալիք արտահերթ խորհրդարանական ընտրություններին ռեյտինգային ընտրակարգով առաջադրված թեկնածուներին և նախընտրական շտաբների ղեկավարներին։ Վալերիյ Օսիպյանը նրանց տեղեկացրել է, որ ոստիկանությունը մայրաքաղաքում և բոլոր մարզերում, այդ թվում՝ Կոտայքում, իրականացրել ու իրականացնում է համապատասխան միջոցառումներ ընտրությունների հետ կապված ապօրինի գործողությունների վերաբերյալ օպերատիվ տեղեկություններ ձեռք բերելու ուղղությամբ։ «Մենք հետևողականորեն և անկաշկանդ արձագանքելու ենք ցանկացած ահազանգի»,- ընդգծել է ոստիկանության պետը՝ ներկաներին հորդորելով ակտիվ համագործակցել ոստիկանների հետ։ Օսիպյանը մանրակրկիտ անդրադաձել է ընտրությունների հետ կապված արգելված գործողություններին ու դրանց կանխարգելման ուղղությամբ համակարգի ձեռնարկած գործնական քայլերին։ Կոտայք կատարած աշխատանքային այցը եզրափակվել է մարզի ոստիկանների հետ հանդիպումով։ Ոստիկանապետի պաշտոնակատարը առանձնացրել է այն հանցատեսակները, որոնց կանխման ու բացահայտման ուղղությամբ պետք է ակտիվացվի աշխատանքը։ Առանձնահատուկ քննարկվել է նախընտրական շրջանում և ընտրությունների օրը Կոտայքի ոստիկանների անելիքները։ Վալերիյ Օսիպյանը, հաշվի առնելով մարզային ոստիկանության կարողությունները, հույս է հայտնել, որ Կոտայքում ևս ընտրությունները կլինեն ազատ ու թափանցիկ։ Ոստիկանության պետը խիստ հրահանգել է, որ պետք է բացառվեն ընտրակաշառք խոստանալու, առաջարկելու, տալու և վերցնելու դեպքերը, ընտրատեղամասերին հարող տարածքում մինչև 50 մետր շառավղով խմբերով հավաքվելը, ընտրատեղամասերի մուտքերի մոտ մեքենաների կուտակումները, կրկնաքվեարկությունը, ընտրատեղամաս զենք-զինամթերքով մուտքը և այլն։