Հունվարի 1-ից ավելանալու է 85 հազար մարդու նպաստ ու թոշակ․ Փաշինյան

Եկող տարվա հունվարի 1-ից ավելանալու է սոցիալապես անապահով խավի 85 հազար մարդու նպաստ ու թոշակ ։ Այս մասին «Իմ քայլը» դաշինքի՝ Ապարանում անցկացված քարոզարշավի ժամանակ ասաց Նիկոլ Փաշինյանը: «Այս մարդկանց թոշակը նույնիսկ հաց ու պանրին չի հերիքում: Մենք առաջին հերթին որոշեցինք այս մարդկանց հարցը լուծել, քանի որ մենք մտածեցինք, որ ամոթ է մեր երկրում սովահար մարդ լինի»,- ասաց Փաշինյանը՝ հավելելով, որ իրենք իրենց առաջ ավելի ամբիցիոզ խնդիր են դրել, որ առաջիկա 5 տարում ՀՀ-ում ծայրահեղ աղքատությունը վերացվի: Փաշինյանը նշեց, որ իրենք վարելու են աղքատության վերացման և աշխատանքի խրախուսման քաղաքականություն: «Մենք ուզում ենք մարդկանց աջակցել, օգնել, որ իրենք իրենց ընտանիքի բարեկեցությունը կարողանան ապահովել ու ոչ թե այն հին վիճակներով, երբ որ կառավարությունն աղքատության խրախուսման քաղաքականություն էր վարում»,-ասաց նա։