Մասնագիտական կրթության որակի բարձրացման մի քանի ձևաչափ ենք դիտարկում. ԿԳՄՍ փոխնախարարի

Մասնագիտական կրթության որակի բարձրացման ուղղությամբ քննարկվում են մի քանի նոր ձևաչափեր, որոնց առանցքում աշխատանքի վրա հիմնված ուսուցման ներդրումն է։ Այս մասին հայտարարել է ԿԳՄՍ նախարարի տեղակալ Արաքսիա Սվաջյանը՝ մասնակցելով Erasmus+ QA4VET ծրագրի շրջանակում իրականացված փորձնական հավատարմագրման արդյունքների ամփոփիչ միջոցառմանը։

Սվաջյանի խոսքով՝ վերանայվելու են մասնագիտական կրթության ոլորտում լիցենզավորման և հավատարմագրման գործընթացները՝ առավել մեծ ուշադրություն դարձնելով կրթության որակի բարձրացմանը։

«Մասնագիտական կրթության որակի բարձրացման մի քանի ձևաչափ ենք դիտարկում։ Առանցքում աշխատանքի վրա հիմնված ուսուցման ներդրումն է։ Պետք է նաև կենտրոնանանք դասավանդողների մասնագիտական կարողությունների զարգացման վրա, ինչպես նաև ուժեղացնենք կառավարման համակարգը»,- նշել է նա։

Փոխնախարարը նաև ընդգծել է, որ մասնագիտական կրթության ոլորտում դիմորդների թիվը տարեցտարի աճում է, իսկ հավատարմագրման գործընթացը կարևոր գործոն է ինչպես կրթության որակի, այնպես էլ ուսանողների վստահության բարձրացման համար։

QA4VET-ը Erasmus+ ծրագրի շրջանակում իրականացվող նախաձեռնություն է, որի նպատակն է զարգացնել մասնագիտական կրթության հաստատությունների ներքին որակի ապահովման համակարգերը։ Ծրագրին միացել է Հայաստանի 9 մասնագիտական ուսումնական հաստատություն, իսկ այն ֆինանսավորվում է Եվրոպական միության կողմից։