Ալիևը՝ Ուկրաինային. «Երբեք մի՛ հաշտվեք օկուպացիայի հետ»

Ադրբեջանի նախագահ Իլհամ Ալիևը՝ անդրադառնալով ռուս-ուկրաինական պատերազմին վերահաստատել է, որ Բաքուն  աջակցում է  Ուկրաինային իր  ինքնիշխանությունն ու տարածքային ամբողջականությունը պաշտպանելու գործընթացում:

Ուկրաինացի լրագրող Դմիտրի Գորդոնի հարցերին պատասխանելիս Ալիևը նշել է, որ որևէ պետության սահմանները չեն կարող փոփոխվել ուժի կիրառմամբ կամ առանց ժողովրդի համաձայնության։

«Ես կրկնում եմ նույն խորհուրդը. երբեք մի՛ հաշտվեք օկուպացիայի հետ։ Ուկրաինան հենց դա է անում։ Նա չի հաշտվում օկուպացիայի հետ, թեև վերջին տարում շատ բարդ պահեր են եղել, և եղել է ճնշում՝ ռազմական գործողությունները դադարեցնելու համար, այն էլ՝ օկուպացիայի փաստացի ձևակերպման պայմանով»,- ասել է Ադրբեջանի նախագահը։

Նրա խոսքով՝ Ադրբեջանի դիրքորոշումը հիմնված է սեփական փորձի վրա, իսկ պաշտոնական Բաքուն պատրաստ է շարունակել հնարավոր աջակցությունը ցուցաբերել ուկրաինացի ժողովրդին։