Իրանը հարվածների շարք է սկսել Մերձավոր Արևելքում ԱՄՆ օբյեկտների ուղղությամբ

Իրանը հարվածների շարք է սկսել Մերձավոր Արևելքում ԱՄՆ օբյեկտների ուղղությամբ, հայտնել է իրանական Press TV հեռուստաալիքը: 

Կատարի պաշտպանության նախարարությունը զեկուցել է հրթիռային հարձակման մասին: Երկրի մայրաքաղաք Դոհայում հնչել են պայթյուններ, միացել է օդային տագնապի ազդանշանը: 

Անօդաչու թռչող սարքերի և հրթիռների գրոհի հետմղման մասին հայտարարել է նաև Արաբական Միացյալ Էմիրությունների պաշտպանության նախարարությունը: 

Օդային տագնապ է հայտարարվել նաև Բահրեյնում: 

Իրանի Իսլամական հեղափոխության պահապանների կորպուսը (ԻՀՊԿ) հայտարարել է Հորդանանում արքայազն Հասանի ավիաբազայում հրամանատարական կենտրոնի և դրոնների համար նախատեսված անգարների ոչնչացման մասին: 

Ավելի վաղ ԻՀՊԿ-ն հայտարարել էր, որ Հորմուզի նեղուցը փակ է «մինչև տարածաշրջանում ԱՄՆ միջամտության ավարտը»։ Իրանը նաև նախազգուշական կրակոցներ է արձակել Հորմուզի նեղուցը հատել փորձող նավի ուղղությամբ։ ԱՄՆ զինված ուժերի Կենտրոնական հրամանատարությունը հայտարարել է, որ Իրանը հարվածել է բեռնատար նավին: Ի պատասխան՝ ամերիկյան կողմը հարվածների շարք է սկսել Իրանի ուղղությամբ։