Ֆոն դեր Լեյենը Էրդողանի նվերը կփոխանցի թանգարանին

Եվրահանձնաժողովի նախագահ Ուրսուլա ֆոն դեր Լայենը Թուրքիայի նախագահ Ռեջեփ Թայիփ Էրդողանից ստացած նվերը կփոխանցի Բրյուսելի ռազմական թանգարանին։ Խոսքը մարտական ատրճանակի մասին է, որը Բելգիայի մայրաքաղաք հասնելուն պես նախապես կենթարկվի հատուկ տեխնիկական ձևափոխման՝ կրակելու հնարավորությունից զրկելու և այն անվնաս դարձնելու նպատակով։

Անկարայում կայացած ՆԱՏՕ-ի գագաթնաժողովի ընթացքում Թուրքիայի ղեկավարը մասնակից երկրների առաջնորդներին նվիրել է 9 մմ տրամաչափի «Գյումյուշայ» տեսակի անվանական ռեվոլվերներ, որոնք հանդիսանում են ամերիկյան հայտնի «Կոլտ Փայթոն» զինատեսակի թուրքական պատճենները։ Տուփերում ներառված են եղել նաև համապատասխան փամփուշտներ։ Չնայած թուրքական կողմը տրամադրել է զենքի արտահանման պաշտոնական թույլտվություն, եվրոպական պետություններում մարտական զենքի ներկրման և տնօրինման խիստ օրենսդրությունը բարդություններ է առաջացրել բազմաթիվ պաշտոնյաների համար։

Հավելենք՝  Մեծ Բրիտանիայի վարչապետ Քիր Սթարմերը նվերը թողել է Թուրքիայում՝ տեղում ապամոնտաժելու և միայն անվտանգ դարձնելուց հետո երկիր ներկրելու պայմանով։